Niderlandakan oragir (niderlandakan) wrote,
Niderlandakan oragir
niderlandakan

Ամստերդամի Սուրբ Հոգի Հայաստանյայց Առաքելական Եկեղեցին տոնում է իր 300 ամյակը

Այս առիթով Սուրբ Հոգի եկեղեցու ծխական խորհրդի կողմից կազմակերպվել էր տոնական միջոցառում, որի շրջանակներում Նիդերլանդների մայրաքաղաք էին ժամանել մի շարք պատվավոր հյուրեր։ Նրանց շրջանակներում հարկ է առանձնացնել Գերաշնորհ Տեր Տարոն եպիսկոպոս Ճերեճյանին ՝ Ֆրանսիայից, Արժանապատիվ Տեր Խաչատուր քահանա Ֆրանկյանին, Կաթոլիկ եկեղեցու ներկայացուցիչ Հարլեմ-Ամստերդամի եպիսկոպոս Հենդրիկսին, Ամստերդամի «Աուդը կերկ» բողոքական եկեղեցուց հովիվ Էդդի Րիֆհաուսին, Նիդերլանդներում ՂՊՏԻ եկեղեցի Ուղափառ եկեղեցու առաջնորդ եպիսկոպոս Անբա Արսենին, Ռուս Ուղափառ եկեղեցուց՝ Սերգեյ վարդապետ Օվսյանիկովին, ինչպես նաև ՝ Սիրյան Ուղափառ եկեղեցու և եկեղեցիների համաշխարհային խորհրդի ներկայացուցիչներին՝ ի դեմս Ամստերդամի վարչության ատենապետ Հենկ Մյուլինկին և այլոց:

Փակ միջոցառմանը ներկա էին նաև Հոլանդիայի Հայ Առաքելական Եկեղեցու ծխական խորհուրդների ատենապետները, հայկական միությունների ղեկավարները, երիտասարդական միությունների ներկայացուցիչները: Հյուրերի շարքում էր նաև Հայ փոստի տնօրեն պարոն Հայկ Ավագյանը, Նիդերլանդներում Հայաստանի դեսպան տիկին Ձյունիկ Աղաջանյանը, հյուպատոս պրն. Գևորգ Պետրոսյանը և նորանշանակ հյուպատոս պրն. Անդրանիկ Գրիգորյանը։ Միջոցառման սկզբում Գերշ. Տ. Տարոն եպս. Ճերեճյանն ընթերցեց Սուրբ Հոգի եկեղեցու 300 ամյակի առիթով հղված Ն.Ս.Օ.Տ.Տ. Գարեգին Բ Ամենայն Հայոց կաթողիկոսի օրհնության գիրը:

Եկեղեցու 300 ամյակի առիթով Երևանից Ամստերդամ էր ժամանել նաև սփյուռքի նախարար տիկին Հրանուշ Հակոբյանը։Նա ընթերցեց ՀՀ նախագահ Սերժ Սարգսյանի՝ Սուրբ Հոգի եկեղեցու 300 ամյակի առիթով շնորհավորական ուղերձը: Տիկին Հակոբյանն իր կողմից նշեց, որ Ամստերդամի հայկական եկեղեցին վերջին տարիներին մեծ առաջընթաց է գրանցել. կապիտալ վերոնորոգումից բացի այն իր պատերի ներսում համախմբում է Նիդերլանդներում բնակվող բոլոր հայերին՝ կազմակերպելով մի շարք հայրենասիրական միջոցառումներ։

Շնորհավորական խոսքերով հանդես եկան նաև Սուրբ Հոգի եկեղեցու ծխական խորհրդի ներկայացուցիչ պարոն Վահան Ավագյանը, Նիդերլանդներում ՀՀ արտակարգ և լիազոր դեսպան Ձյունիկ Աղաջանյանը, Հարլեմ-Ամստերդամի եպիսկոպոս Գրշհ. Հենդրիկսը, Աուդը Կերկ բողոքական եկեղեցու հովիվ Էդդի Րիֆհաուսը, Ռուսական եկեղեցու և Եկեղեցիների համաշխարհային խորհրդի ներկայացուցիչները: Միջոցառման շրջանակներում իրենց զեկույցներով հանդես եկան նաև ազգությամբ հոլանդացի հայագետ պրոֆ. Ռենե Բեկյուսը և Օքսֆորդի համալսարանի պրոֆեսոր, հայագիտության ամբիոնի վարիչ, հայագետ Թեո վան Լինտը:

Միջոցառման պաշտոնական մասին հաջորդեց հայկական ավանդական խորտիքների հյուրասիրությունը, որի ընթացքում սոպրանո Ռուզաննա Նաապետյանը՝ Իրինա Պարֆյոնովայի նվագակցությամբ, կատարեց Կոմիտասի մի շարք ստեղծագործություններ։

Սուրբ Հոգի եկեղեցին հիմնվել է 1714 թ. 40 հայ վաճառականների և Վանանդեցիների տպարանի պատասխանատու Թորգոմ Արքեպիսկոպոսի կողմից: 1874 թ. եկեղեցին վաճառվել է «Ամենասուրբ Փրկիչ» բարեգործական կաթոլիկ միությանը: Վերջիններս, իրենց հերթին, այն հանձնել են սեփական հսկողության տակ գտնվող մայրապետներին, ովքեր էլ հայկական եկեղեցին վերածել են կաթոլիկ դպրոցի: 1985 թ. հոլանդահայերի կատարած հանգանակությունների, Հայկական Բարեգործական Ընդհանուր Միության և Մայր Աթոռ Սուրբ Էջմիածնի տրամադրած միջոցներով հաջողվել է վերագնել եկեղեցին:

Այսօր Ամստերդամի Սուրբ Հոգի եկեղեցին շարունակում է իր լուման ներդնել հավատացյալ հայորդիներին՝ իր հովանու տակ հավաքելու և ազգապահպանման կարևոր գործում: Եկեղեցու հայկական համայնքը՝ «ԱՅՕ» երիտասարդական միության անմիջական աջակցությամբ, ակտիվ բարեգործական գործողություն է ծավալում Նիդերլանդներում՝ պարբերաբար կազմակերպելով բազմաբովանդակ միջոցառումներ և ուխտագնացություններ։ Համանքն ակտիվ է նաև միջեկեղեցական հարաբերություններում. այցելում և համագործակցում է կաթոլիկ, ռուս ուղափառ, սիրյան և ՂՊՏԻ եկեղեցիների հետ, ինչպես նաև՝ եկեղեցիների համաշխարհայի խորհրդի Ամստերդամի վարչության հետ:

Եկեղեցու հովանու ներքո գործում է Սուրբ Գրիգոր Նարեկացու անունը կրող կիրակնօրյա դպրոցը, որտեղ շուրջ 90 հայ երեխաներ ու երիտասարդներ ստանում են հայոց լեզվի, հայրենագիտության, հայոց պատմության և կրոնի դասընթացներ: Հայ երիտասարդների և աշակերտների ակտիվ ու անմիջական շփումն ապահովելու նպատակով՝ եկեղեցում գործում է նաև երգի և պարի խմբակ, որը հնարավորեւթյուն է տալիս հայրենիքից հեռու բնակվող հայերին չմոռանալ իրենց արմատները, հայ երգն ու պարը:
ՄԱՐԻՇԱ ՇԻԿ
Orer.am

Tags: Նամականի, Շնորհավորանքներ.բարեմաղթանքներ, հղումներ.կապ.համագործակցություն
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments