niderlandakan (niderlandakan) wrote,
niderlandakan
niderlandakan

Միջոցառումներ Ղարաբաղյան ազատամարտի 25-ամյակի կապակցությամբ


Հաագա, 26 փետրվարի 2013 – Ղարաբաղյան ազատամարտի 25-ամյակի կապակցությամբ այս տարի Հոլանդահայ Կազմակերպությունների Ֆեդերացիան (FAON) կազմակերպում է մի շարք միջոցառումներ, այդ թվում  դասախոսություններ, քննարկումներ, գիտաժողով, ինչպես նաև նամակներ պաշտոնական կառույցներին և հանդիպումներ Հոլանդիայի կառավարության և խորհրդարանի ներկայացուցիչների հետ: Միաժամանակ Հոլանդահայ Ֆեդերացիան հարգանքի տուրք է մատուցելու Սումգայիթի (փետրվար 1988), Կիրովաբադի (նոյեմբեր 1988) և Բաքվի (հունվար 1990) ջարդերի զոհերի հիշատակին:


2013 թվականի փետրվարի 24-ին Հաագայի Աբովյան մշակութային միության կենտրոնում տեղի ունեցավ Ամստերդամի համալսարանի Կովկասի հարցերով փորձագետ դոկտոր Շարլոտ Հիլլի դասախոսությունը: Դոկտոր Հիլլը հեղինակն է «Կովկասում պետականության կազմավորում և հակամարտությունների կառավարում» գրքի:

«Լեռնային Ղարաբաղը 25 տարիների պայքարից հետո. որտե՞ղ ենք հիմա կանգնած» խորագրով դասախոսության ընթացքում դոկտոր Հիլլը արցախյան շարժման պատմական ակնարկից հետո կանգ առավ Լեռնային Լարաբաղում պետականության կազմավորման տարրերի և հակամարտության բանակցային գործընթացի, ԵԱՀԿ Մինսկի խմբի դերի և հակամարտության լուծումների տարբեր տարբերակների վրա: Նա շեշտեց, որ հույժ կարևոր է Նիդերլանդներում շարունակաբար անդրադառնալ Ղարաբաղի չլուծված և տագնապալից իրավիճակին: Դասախոսությանը ներկա էր նաև ՀՀ դեսպան տիկին Ձյունիկ Աղաջանյանը, որն իր բացման խոսքում անդրադարձավ Սումգաիթի ջարդերի 25-ամյակին, ինչպես նաև Կիրովաբադի և Բաքվի ողբերգություններին: Տիկին Աղաջանյանն իր ելույթում նշեց, որ ղարաբաղյան պայքարի 25 տարիների ընթացքում Լեռնային Ղարաբաղի Հանրապետությունը ձեռք է բերել բազում նվաճումներ, որոնք իրականացել են նույնպես թե՛ Հայաստանի և թե՛ Սփյուռքի հայերի համատեղ ջանքերի շնորհիվ: Ըստ դեսպանի կան չլուծված բազում հարցեր, սակայն նա հույս հայտնեց, որ հակամարտությունը կկարգավորվի արագ և խաղաղ պայմաններում և տարածաշրջանում կհաստատվի կայուն խաղաղություն:

Հոլանդահայ Ֆեդերացիան նախատեսում է գալիք ամիսներին կազմակերպել դասախոսություններ և գիտաժողովներ, որտեղ գիտնականների և քաղաքական գործիչների մասնակցությամբ կքննարկվի Ղարաբաղի հիմնահարցը:

Այսօր Հոլանդահայ ֆեդերացիան մի գրությամբ դիմել է հոլանդական կառավարությանը և խորհրդարանին կոչ անելով ուշադրություն դարձնել ղարաբաղյան հիմնախնդրին:

Դիմելով Նիդերլանդների կառավարությանը և խորհրդարանին, Հոլանդահայ Ֆեդերացիան նշել է, որ անհրաժեշտ է բացահայտ ուշադրություն դարձնել ղարաբաղյան հակամարտությանը, որն արդեն 25 տարի է ինչ շարունակվում է` մարդկային ողբերգության պատճառ հանդիսանալով, որը հարատևում է ցայսօր: Հոլանդահայ Ֆեդերացիան մասնավորապես իր մտահոգությունն է հայտնել Ադրբեջանում տեղի ունեցող զարգացումների առնչությամբ, որտեղ անընդհատ սպառնում են վերսկսել զինված պայքարը և որտեղ սպառազինության վազքը մեծ ծավալների է հասել, միչդեռ երկրում իշխում է հակաժողովրդավարական ռեժիմ, որը խախտելով մարդու իրավունքները, մամուլի և խոսքի ազատությունը, անտեսում է միջազգային իրավական կարգը: Սպառնալից է նաև հայերի դեմ ստեղծված ատելության մթնոլորտը, որին միտումնավոր կերպով նպաստում են Ադրբեջանի իշխանությունները: Հանրահայտ է Սաֆարովի պարագան, երբ Հունգարիայի արտահանձնումից հետո նրան Ադրբեջանում դիմավորեցին ինչպես ազգային հերոսի և ներում շնորհեցին նախագահական հրամանագրով: Սաֆարովը Հունգարիայում դատապարտված էր ցմահ ազատազրկման` Բուդապեշտում ՆԱՏՕ-ի համատեղ ուսուցման ծրագրի շրջանակում քնած հայ սպային կացինով սպանելու համար: Իսկ վերջերս հալածանքի մեծ ալիք է բարձրացել Ադրբեջանցի գրող Աքրամ Այլիսլիի դեմ, այն պատճառով միայն, որ նա իր գրքում գրել է թե հայերն իր թշնամինները չեն եղել:

Հոլանդահայ Ֆեդերացիան դիմում է կատարել, որպեսզի հանդիպումներ կազմակերպվեն հոլանդական խորհրդարանի արտաքին հարաբերությունների հանձնաժողովի անդմների և ԵԱՀԿ-ի խորհրդարանական վեհաժողովի և Եվրոպայի խորհրդի հոլանդական պատվիրակության անդամների հետ, որպեսզի հավելյալ տեղեկություններ հաղորդվեն Լեռնային Ղարաբաղի իրավիճակի մասին և մտքերի փոխանակում տեղի ունենա հակամարտության հետագա ընթացքի, ինչպես նաև հնարավոր լուծումների շուրջ:

Tags: հաղորդագրություն. միջոցառում
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments