niderlandakan

«Դարսի» փոթորիկը տոն է պարգեւել




Անուշ Թրվանց 16:17 | 09.02.2021 43 դիտում

1963-ից հետո առաջին անգամ Նիդերլանդներում առատ ձյուն է տեղացել: Եղանակային այս անակնկալին հոլանդացիները սպասել են շաբաթներ շարունակ: Դեռեւս օրեր առաջ մամուլի եւ հեռուստատեսության գլխավոր թեման սպասվող ձյունն էր. կանխատեսման համաձայն՝ առատ ձյուն էր տեղալու՝ մինչեւ 25 սմ: Ձյունը վերջապես տեղացել է կիրակի օրը: Թեեւ երկրում խաթարվել է բնականոն կյանքը, եւ հայտարարվել օդերեւութաբանական վտանգավորության կարմիր աստիճան, բայց ձյունը հոլանդացիների համար մեծ տոնի է վերածվել:

Միջազգային մամուլը (BBC, The Guardian եւ այլն) նույնպես անդրադարձել է Եվրոպայում մոլեգնող «Դարսի» անունով փոթորկին ու հոլանդական ձյանը՝ նշելով, որ ձյունն այդ երկրում իրադարձություն է թե՛ մեծերի, թե՛ փոքրերի համար:
Կիրակի օրվա առատ ձյան բերած զգացողությունները համեմատվել են այդ երկրի ամենացրտաշունչ եւ ամենաձյունառատ տարվա՝ 1963-ի տրամադրությունների հետ. 1963-ը միջազգային մամուլը անվանել է «նիդերլանդական նոստալգիա», որը հատուկ նշանակություն ունի այն ապրածների կյանքում: Բայց 1962-1963-ի ձմեռը հիշում են նաեւ Եվրոպայի մյուս բնակավայրերում. ցրտաշունչ այդ ձմռանը Եվրոպայում 730-ից ավելի մարդ է մահացել, բազմաթիվ կենդանիներ ցրտահարվել են, որոշ տեղերում օդի ջերմաստիճանը մինչեւ -20 է եղել, կյանքի բնականոն ընթացքը խանգարվել է, բայց ոմանք այդ տարին համարել են իսկական հեքիաթային ձմեռ, երբ Եվրոպայի մի մասը երեք ամիս շարունակ թաղված է եղել ձյան հաստ շերտի տակ:

«Նիդերլանդական օրագիր» հայկական կայքի խմբագիր Աշոտ Կնյազյանը պատմում է, որ այսօր էլ, թեեւ Նիդերլանդներում ջերմաստիճանը ցածր է 0-ից, շատ ճանապարհների մերկասառույց է, բայց դա երկրի բնակիչներին չի խանգարում վայելելու ձյունը:

Կնյազյանը «Ալիք մեդիա»-ին մանրամասներ հայտնեց նիդերլանդական աննախադեպ ձմռան մասին: «Առատ ձյունը ձմեռային մարզաձեւերի սիրահարների համար տոն է. ամենուր չմուշկներով ու սահնակներով մրցումներ են: Եթե ոմանք ձմեռը վայելում են դրսում, ոմանց համար էլ այն տոնի է վերածվում տանը, երբ սառը եղանակն ու մերկասառուցը ստիպում են տնից դուրս չգալ: Դպրոցները երկուշաբթի փակ էին, գնացքների չվացուցակը խափանվել է, շատ տեղերում չեն աշխատել գնացքները: Անցած քսանչորս ժամվա ընթացքում 30 միլիոն կիլոգրամ աղ է ցանվել մոտ 900 աղ ցանող մեքենաներով: Մերկասառույցի պատճառով դժվարանցանելիություն է հատկապես երկրի կենտրոնում եւ հյուսիսում: Ձյունն ու ցրտահարությունը տարբեր վայրերում հանգեցրել են էլեկտրականության խափանումների: Թեեւ ձյունը կանխատեսված էր, երկիրը պատրաստվում էր, բայց ավտոբուսների, տրամվայների ու մետրոյի երթեւեկությունը նույնպես խափանվել է: Հոլանդիայի օդանավակայաններում որոշ թռիչքներ հետաձգվել են: Կիրակի օրը Էյնդհովենի օդանավակայանում չվերթները դադարեցվել էին, դրանք մասամբ վերականգնվել են երկուշաբթի: Դեպի Վատտեն ծովի կղզիներ լաստանավերը մեկնել են ժամանակացույցից դուրս: Առավելագույն ջերմաստիճանը -5 աստիճան է, իսկ հյուսիսարեւելյան քամու պատճառով հնարավոր է հասնի -15-ի»:

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

լուս․ Սոնա Սահակյանի

Նիդերլանդներում ապրող հայերի օրակարգը, սակայն, այս օրերին այլ է: Երկրում շարունակում են հանգանակություններ կատարել եւ ուղարկել Հայաստան ու Արցախ: Նիդերլանդներից ուղարկվում է ամեն ինչ՝ գումար, սնունդ, վերմակ, բարձ, տաք ծածկոցներ ու բաճկոններ, սրբիչ, հագուստ, քնապարկ, գեներատոր…

Պատերազմի պատճառով տեղահանված մի բազմանդամ ընտանիքի համար հոլանդահայերի նվիրատվությամբ Սիսիանի Իշխանասար համայնքում գնվել է 2000 քմ հողատարածք՝ երկհարկանի տնով: Տեղեկացանք, որ Նիդերլանդների «Արարատ» բարեգործական միության (որի շուրջն են հիմնականում համախմբված հոլանդահայերը) ներկայացուցիչը Հայաստան ու Արցախ է այցելել եւ անձամբ հասցրել հոլանդահայերի օգնությունը:

«Միությունը, համագործակցելով հայաստանյան բարեգործական կազմակերպությունների ու կամավորական խմբերի հետ, միաժամանակ աջակցություն ստանալով հոլանդահայ մի շարք կազմակերպություններից ու անհատներից, կարողացավ մի փոքր թեթեւացնել հարյուրավոր մարդկանց ամենօրյա հոգսը: Կազմվել է նոր ծրագիր, եւ առաջիկայում պատերազմի պատճառով տեղահանված եւ խնամակալին կորցրած մի շարք արցախցի ընտանիքներ հոլանդահայերի աջակցությամբ կստանան կովեր կամ այլ ընտանի կենդանիներ, աշխատանքային գործիքներ»,- պատմեց մեր զրուզակիցը:

Աշոտ Կնյազյանը տեղեկացրեց նաեւ, որ այսօր Նիդերլանդներում ապրող հայերը եւս մեկ կարեւոր թեմա ունեն՝ ուշիուշով հետեւում են Նիդերլանդների խորհրդարանում Հայոց ցեղասպանության ճանաչման միջնորդությունը նորից քննարկման դնելու հարցին:

Նիդերլանդների խորհրդարանի մեծամասնությունը կառավարության կաբինետին այսօր կոչ է անելու ճանաչել Հայոց ցեղասպանությունը: «Թեեւ խորհրդարանը հասցրել է երկու անգամ դատապարտող բանաձեւեր ընդունել, բայց կառավարությունը դեռեւս չի ճանաչել հարցը Թուրքիայի հետ հարաբերությունները չխաթարելու զգուշավորությամբ: Այս բանաձեւը ներկայացրել է պատգամավոր Ջոել Ֆորդեւինդը, եւ Հոլանդահայ կազմակերպությունների ֆեդերացիան արդեն ողջունել է նրա այս միջնորդությունը, որը լայն աջակցություն է գտել Ներկայացուցիչների պալատում:

Հիշեցնեմ, որ հոլանդական կառավարության կաբինետը մինչ այժմ «Հայոց ցեղասպանության» փոխարեն օգտագործում է «Հայոց ցեղասպանության խնդիր» արտահայտությունը»:

Անուշ Թրվանց

Երբ լրագրողական աշխատանքի բերումով սկսում ես որոնել՝ որտե՞ղ է թաղված շան գլուխը, եւ հընթացս պարզում՝ որտե՞ղ են ձմեռում խեցգետինները, ուրեմն ճիշտ ճանապարհին ես

   

Error

default userpic

Your reply will be screened

Your IP address will be recorded 

When you submit the form an invisible reCAPTCHA check will be performed.
You must follow the Privacy Policy and Google Terms of use.