niderlandakan (niderlandakan) wrote,
niderlandakan
niderlandakan

«Art of Duo» -ի ձայնասկավառակի համերգ-շնորհանդեսը՝ Բրյուսելի «Հայ տուն» մշակութային կենտրոնում

10603521_839441606088426_3174344264283675162_n

Նոյեմբերի 9-ին, ժամը  19։00-ին, Բրյուսելի «Հայ  տուն» մշակութային կենտրոնում տեղի կունենա «Art of Duo» նախագծի դեբյուտային ձայնասկավառակի համերգ-շնորհանդեսը: Նախագիծը հիմնել են ամուսիններ Հրայր Կարապետյանը եւ Հասմիկ Մանուկյանը՝ 2008թ.-ին՝ նպատակ ունենալով ներկայացնելու ջութակ-դաշնամուր դուետի համար գրված համաշխարհային դասական, ինչպես նաեւ ժամանակակից ստեղծագործությունները։

Հասմիկը՝ դաշնակահար է, Հրայրը՝ ջութակահար։ Երաժշտական կրթություն ստանալով Երեւանի Կոմիտասի անվան պետական կոնսերվատորիայում՝ 2012թ․-ից մասնագիտական կրթությունը շարունակում են Բելգիայում՝  «LUCA» արվեստի դպրոցում։

Դուետը վարպետության դասընթացներ է ունեցել Էդուարդ Թադեւոսյանի, Սուսաննա Երիցյանի, Սուրեն Զաքարյանի, Գայանե Հովհաննիսյանի, Ալան Վայսի, Չայմ Թաուբի, Գայ Բրաունշտեյնի եւ այլոց հետ:

Նախագծի շրջանակներում հանդես են եկել Հայաստանում, Ռուսաստանում, Բելգիայում, Ֆրանսիայում, Անգլիայում, Ավստրիայում, Գերմանիայում, Հոլանդիայում, Իտալիայում։

Նախագծի առաջին ձայնասկավառակը, որը ընդգրկում է Էդուարդ Գրիգի թիվ 3 եւ Առնո Բաբաջանյանի սոնատները՝ ջութակի և դաշնամուրի համար, Բելգիայի երաժշտասեր հասարակությանը կներկայացվի նոյեմբերի 9-ին:

« «Art of Duo» նախագիծը հիմնեցինք, երբ դեռ սովորում էինք Երեւանում՝ Կոնսերվատորիայի 2-րդ կուրսում:  Սկզբում համերգներով հանդես էինք գալիս Հայաստանում:  Ժամանակի ընթացքում հրավերներ ստացանք տարբեր երաժշտական փառատոներից եւ ընդլայնեցինք մեր դուետի համերգային գործունեությունը» ,- «Հայերն այսօրի»  հետ զրույցում ասաց Հրայրը:

«Ձայնասկավառակը կրում է նախագծի անունը:  Երկու սոնատն էլ պարունակում են ազգային երաժշտության տարրեր: Նպատակներից մեկը Բաբաջանյանի սոնատը ունկնդրին հանրամատչելի դարձնելն է, քանի որ այս սոնատն ունի շատ քիչ ձայնագրված տարբերակներ։ Ձայնասկավառակը նվիրված է հորս՝ Հայկ Կարապետյանի հիշատակին(«Հայերն այսօրի» նախկին գլխավոր խմբագիր)»,- նշեց նա:

«Art of Duo» -ն   համագործակցում է եվրոպական և հայկական կառույցների և ուսանողական միավորումների հետ:  «Նոյեմբերի 9-ին կայանալիք ձայնասկավառակի շնորհանդեսի կազմակերպչական հարցերում մեզ շատ մեծ աջակցություն է ցուցաբերում Բելգիայի «Հայասա» հայ ուսանողական միավորումը»,- հավելեց Հրայրը:
Hayern Aysor

Tags: Նամականի, հաղորդագրություն. միջոցառում, հղումներ.կապ.համագործակցություն, մշակութային
Subscribe
  • Post a new comment

    Error

    default userpic

    Your reply will be screened

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 0 comments